ජාතික ඔලිම්පික් කමිටුවේ නිලවරණය ලබන අප්රේල් මසට පෙර පවත්වන ලෙස ජාත්යන්තර ඔලිම්පික් කමිටුව විසින් වත්මන් ජාතික ඔලිම්පික් කමිටු සභාපතිවරයා වන සුරේෂ් සුබ්රමනියම් වෙත දැනුම් දී තිබෙනවා.
ජාතික ඔලිම්පික් කමිටුවේ නිල කාලය පසුගිය දෙසැම්බර් මස 27 වැනිදා අවසන් වුණා.
ජාතික ඔලිම්පික් කමිටුවේ නිල කාලය අවසන්ව තිබියදී එහි සභාපති සුරේෂ් සුබ්රමනියම් මහතා ජාත්යන්තර ඔලිම්පික් කමිටුවට දැනුම්දී තිබුණේ පසුගිය කාලයේ සිදූ කරන ලද මූල්ය මෙහෙයුම් සහ අභ්යන්තර කළමනාකරණය විමර්ශනය කිරීම සඳහා වෝහාරික විගණනයක් සිදු කරන බැවින් එම කටයුතු නිමවන තුරු තමන්ට සභාපති තනතුරේ රැඳී සිටීමට අවසර දෙන ලෙසයි.
සභාපති සුරේෂ් සුබ්රමනියම් මහතා හා වෙනත් විවිධ පාර්ශ්වයන්ගෙන් ලැබුණු ලිපිවලට ප්රතිචාර වශයෙන් නිලවරණය සම්බන්ධ උපදෙස් මාලාවක් ද ජගත් ඔලිම්පික් කමිටු සබඳතා දෙපාර්තමේන්තුව නිකුත් කර කිබෙනවා.
ජාත්යන්තර ඔලිම්පික් කමිටුව විසින් ජාතික ඔලිම්පික් කමිටු සභාපතිවරයා වෙත යොමු කළ ලිපියෙන් අවධානය යොමු කර ඇති කරුණු ගණන 5ක්.
එහිදි දැනට ජාතික ඔලිම්පික් කමිටුව විසින් ආරම්භ කර තිබෙන වෝහාරික විගණනය කඩිනමින් අවසන් කර අප්රේල් මාසයට පෙර අවශ්ය නීතියමය පියවර ගන්න ලෙස දැනුම් දී තිබෙනවා.
එම පරීක්ෂණය මෙරට ඔලිම්පික් කමිටුවේ අභ්යන්තරව සිදුවන නිසා එය ජාතික ඔලිම්පික් කමිටුවේ නිලවරණය කල්දැමීමට හේතුවෙන් කර නොගත යුතු බවද ලිපියේ සඳහන්.
2025 ජනවාරි 15 වැනිදා ජගත් ඔලිම්පික් කමිටුව සහ ආසියානු ඔලිම්පික් සංගමය විසින් දැනුම් දුන් පරිදි දැනට පරීක්ෂණයකට ලක්ව සිටින හෝ දඬුවම් ලැබී ඇති ශ්රී ලංකා ඔලිම්පික් සාමාජිකයෙකු හෝ නිලධාරියෙකු ශ්රී ලංකා ඔලිම්පික් කමිටුවේ කටයුතුවල කිසිදු ආකාරයකට සම්බන්ධ නොවිය යුතු අතර, මහ සභා රැස්වීමකට සහභාගී වීමට හෝ ඉදිරියේ පැවැත්වෙන ශ්රී ලංකා ඔලිම්පික් කමිටුවේ නිලවරණයේ කිසිදු තනතුරක් සඳහා තරග කිරීම ද තහනම් වන බවත් මෙම ලිපියෙන් දැනුම් දී තිබෙනවා.
එමෙන්ම ජාතික ඔලිම්පික් කමිටුවේ නිලවරණය පවත්වන තුරු ජගත් ඔලිම්පික් කමිටුව සහ ආසියානු ඔලිම්පික් සංගමය විසින් දැනට පවතින ශ්රී ලංකා ඔලිම්පික් කමිටුවේ විධායක කමිටුව පිළිගන්නා බවද ලිපියේ වැඩිදුරටත් සඳහන්.
මේ අතර නිලවරණය නොපවත්වා ව්යවස්ථා විරෝධි ලෙස තනතුරුවල රැඳී සිටීම සම්බන්ධයෙන් ක්රීඩා සමාජ ප්රධානීන් කිහිපදෙනකු ගොනු කළ පැමිණිල්ලක් සලකා බැලූ ක්රීඩා ඇමැති සුනිල් කුමාර ගමගේ මහතා විසින් ඊයේ ජාතික ඔලිම්පික් කමිටු සාමාජිකයන් සියලු දෙනා ක්රීඩා අමාත්යාංශයට කැඳවූවා.
එහිදී ගැටලුවකින් තොරව ඉදිරි නිලවරණය සඳහා තීරණ කිහිපයකට එළැඹ තිබෙනවා.
එහිදී අමාත්යවරයා දැනුම් දී ඇත්තේ මාසයක් ඇතුළත විශේෂ මහ සභාවක් කැඳවා නිලවරණ කමිටුව පත්කර ගැනීම හා අනතුරුව නාමයෝජනා භාර ගැනීමට දින නියම කළ යුතු බවයි.
ඔලිම්පික් කමිටු ඡන්ද අයිතිය හිමි සාමාජික සංගම් 28න් 18ක ක්රීඩා සංගම් ප්රධානීන් ඊයේ පැවති සාකච්ඡාවට එක්ව සිටියා.
