දිට්වා සුළි කුනාටුව හේතුවෙන් ඇතිවූ සිදුවූ ආපදා අවම කර ගැනීම සඳහා අවශ්ය පියවර ගැනීමට අපොහොසත් වීම තුළින් රජය සිය මූලික මිනිස් අයිතිවාසිකම් උල්ලංඝනය කර ඇති බවට තීන්දුවක් ලබාදෙන ලෙස ඉල්ලා මහනුවර ප්රදේශයේ පදිංචි නීතිඥවරයෙකු විසින් ශ්රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කර තිබෙනවා.
නීතිඥ කීර්ති බණ්ඩාර කිරිදෙන මහතා විසින් ඉදිරිපත් කර ඇති එම පෙත්සමේ වග උත්තරකරුවන් ලෙස ජනාධිපතිවරයා වෙනුවෙන් නීතිපතිවරයා, අග්රාමාත්යය හරිනි අමරසූරිය ඇතුළු අමාත්ය මණ්ඩල සාමාජිකයින් සහ ජාතික ආපදා කළමනාකරණ කමිටුවේ සාමාජිකයින් ඇතුළු පිරිසක් නම් කර තිබෙනවා.
මහනුවර ප්රදේශයේ නීතිඥයකු ලෙස කටයුතු කරන නීතිඥ කීර්ති බණ්ඩාර කිරිදෙන මහතා සිය පෙත්සම මගින් කියා සිටින්නේ තම නීතිඥ කාර්යාලය මහනුවර අධිකරණ සංකීර්ණයට යාබදව පිහිටා තිබෙන බවත් පසුගිය දිනවල ඇති වූ සුළි කුණාටු හා ගංවතුර තත්ත්වය හේතුවෙන් එම කාර්යාලය සම්පූර්ණයෙන්ම විනාශයට පත්වූ බවයි.
ඒ හේතුවෙන් සිය පරිගණකය ද විනාශ වී ඇති බවත් එහි තිබූ වැදගත් දත්ත රැසක් විනාශයට පත් වී ඇති බවත් මේ හේතුවෙන් සිය වෘත්තියට දැඩි පාඩුවක් සිදුවී ඇති බවත් ඔහු කියා සිටිනවා.
නීතිඥවරයා මෙම පෙත්සුම හරහා පවසන්නේ ආපදා තත්වයක් ඇතිවීමට පෙර ගත යුතු ක්රියාමාර්ග සම්බන්ධයෙන් වග උත්තරකරුවන්ගේ නොසැලකිලීමත්භාවය හෝ රාජකාරිය පැහැර හැරීම හේතුවෙන් මෙවැනි විනාශකාරී තත්ත්වයක් උද්ගත වූ බවයි.
ඔවුන් පෙර සූදානමින් කටයුතු කර තිබුණේ නම් සිදුවිය හැකි හානි අවම කර ගැනීමට හැකියාව තිබූ බවත් පෙත්සම්කරු කියා සිටිනවා.
විශේෂයෙන්ම කොත්මලේ ජලාශයේ ජලය මුදා හැරීමට පෙර නිසි ලෙස ජනතාව දැනුවත් කිරීමට කටයුතු කළේ නම් ගම්පොල, ගලහ, පේරාදෙණිය සහ මහනුවර යන ප්රදේශවල ජලගැලීම් හේතුවෙන් සිදුවූ දැවැන්ත හානි අවම කර ගැනීමට හැකියාව තිබූ බවත් මේ පෙත්සමෙන් වැඩි දුරටත් පැවසෙනවා.
නීතිඥ කීර්ති බණ්ඩාර කිරිදෙන මහතා චෝදනා කරන්නේ, වග උත්තරකරුවන්ගේ නොසැලකිලිමත් ක්රියා කලාපය නිසා මෙම ආපදා තත්ත්වය හේතුවෙන් සිදු වූ විනාශය උත්සන්න වූ බවයි.
ඒ අනුව වග උත්තරකරුවන්ගේ නොසැලකිලිමත් ක්රියා කලාපය හේතුවෙන් සිය මූලික මිනිස් අයිතිවාසිකම් උල්ලංඝනය වී ඇති බවට තීන්දුවක් ලබාදෙන ලෙසත් පෙත්සම්කරු ශ්රේෂ්ඨාධිකරණයෙන් වැඩිදුරටත් ඉල්ලා සිටි.
