වත්මන් රජය රටේ ඉතිරිව පවතින රාජ්ය සේවය ද විනාශ කරමින්, සුදුසුකම් හා පළපුරුද්දක් නොමැති පක්ෂයේ හිතවතුන් ඒ සඳහා පත් කරමින් සිටින බවට හිටපු ජනාධිපති චන්ද්රිකා බණ්ඩාරනායක කුමාරතුංග මහත්මිය පවසනවා.
ඇය මේ අදහස් පල කර තිබුණේ හිටපු ජනාධිපති ලේකම්වරයෙක් වන සමන් ඒකනායක මහතා රක්ෂිත බන්ධනාගාරගත කිරීමේ සිද්ධියට අදාළව සිය නිල ෆේස්බුක් ගිණුමේ සටහනක් තබමින්.
හිටපු ජනාධිපති රනිල් වික්රමසිංහගේ විදෙස් සංචාරයක් සඳහා අරමුදල් අනුමත කිරීමේ සිද්ධියකට අදාළව දැනට රක්ෂිත බන්ධනාගාරගත කර සිටින හිටපු ජනාධිපති ලේකම් සමන් ඒකනායක පිළිබඳ සහ මෙරට රාජ්ය සේවය පිළිබඳ හිටපු ජනාධිපති චන්ද්රිකා බණ්ඩාරනායක කුමාරතුංග මහත්මිය සිය නිල ෆේස්බුක් ගිණුමේ අදහස් පල කර තිබෙනවා.
එහිදී තමා සමන් ඒකනායකව පෞද්ගලිකව හඳුනන බවත්, ඔහු ඉතා අවංක සහ ඉහළ වෘත්තීය මට්ටමක රාජ්ය නිලධාරියෙකු බවත් ඇය සඳහන් කරනවා.
එමෙන්ම යුක්තිය පසිඳලීම තෝරාගත් පිරිසකට පමණක් සීමාවීම රටේ පාලන පද්ධතියට බරපතළ තර්ජනයක් බවද හිටපු ජනාධිපතිනි චන්ද්රිකා බණ්ඩාරනායක කුමාරතුංග මෙහිදී අවධාරණය කර තිබෙනවා.
එහිදී ඇය වැඩිදුරටත් සඳහන් කර ඇත්තේ,
“වෘත්තීය මට්ටමේ, කාර්යක්ෂම සහ අවංක රාජ්ය සේවයකින් තොරව රජයකට ඉදිරියට යා නොහැකියි. දේශපාලන නායකයන්ට පරිපාලන පළපුරුද්දක් නොතිබුණද, ඔවුන්ට නොසැලෙන අවංකභාවයක් තිබිය යුතු අතර රට පාලනය කිරීමේදී වෘත්තීය මට්ටමේ නිලධාරීන් මත විශ්වාසය තැබිය යුතුයි. අපගේ ශ්රේෂ්ඨ ජාතිය නැවත ගොඩනඟන්නේ කෙසේදැයි ප්රජාතන්ත්රවාදීව තීරණය කළ යුතුයි” යනුවෙනි.
